Lestrarsprettur
now browsing by tag
Bangsalestrarsprettur
Bangsalesturinn er 16 bóka lestrarátak þar sem finna má jafnmörg form og táknmyndir til að leggja inn meðan á átakinu stendur. Ógrynni er til af bangsabókum og bangsasögum, og margir frægir bangsar hafa sett svip sinn á reynsluheim grunnskólabarna. Má þar nefna Paddington, Bangsímon og Róbert bangsa sem dæmi. Bangsalestrarsprettinn má nota sem hefðbundinn lestrarsprett með hvaða söguefni sem er og þá er einn bangsi litaður eftir lestur hverrar bókar, eða til að demba sér í þemalestur þar sem bangsar af öllum stærðum og gerðum eru aðalsögupersónurnar. Dröfn Vilhjálmsdóttir á skólabókasafni Seljaskóla tók saman skemmtilegan bangsabókalista sem má finna hér.
Astrid Lindgren bókabingó
Astrid Lindgren hefur samið fjöldann allan af frábærum barnabókum. Í bókabingóinu kynnast lesendur átta af þessum perlum og nokkrum af eftirminnilegustu persónunum hennar eins og Ronju Ræningjadóttur, Emil í Kattholti, Maddit, Kalla á þakinu og Línu Langsokk. Bókabingó með Astrid Lindgren er tilvalið að nota á þemadögum 🙂 Góða skemmtun við lesturinn!
Sjóræningjalestur
Sjóræningjalestur er skemmtileg klippilestraráskorun þar sem nemendur lesa í 10 skipti og velja miða hjá kennara (eða draga) til að líma í reitina. Áður en lestrarátakið hefst er hægt að setja sér lestrarmarkmið og skrifa í reitina, t.d. fjölda mínútna eða blaðsíðna sem barnið ætlar sér að lesa áður en límt er yfir reitinn. Í stóra reitinn teikna nemendur sjálfsmynd af sér með sjóræningjahattinn. Miðana má nota í margvísleg önnur verkefni t.d. til að para saman, draga miða og skrifa hvað er á honum eða draga miða, koma upp í pontu og tala um það sem dregið var í 1-2 mínútur.
Sjá einnig
- Merkisdagurinn Talaðu eins og sjóræningi eða Talk like Pirate Day.
- Ritunarverkefni: Sjóræningjasaga.
Myndir:
- Fiskamyndirnar í verkefninu eru fengnar á vefnum Freepik.com, sjá hér.
- Ljósmynd af kolkrabba er af vefnum PNGALL.com.
- Fjársjóðskista er teiknuð af Tim Newlin og fengin af síðunni Coloring.com.
- Myndefnið í klippimiðunum er fengið á Aliexpress.com.
marglytturnar boðlestur
Það er ekki hægt annað en að henda í boðlestur til heiðurs Marglyttunum okkar sem í skrifuðum orðum eru að synda yfir Ermasund milli Englands og Frakklands. Lestrarsprettinn má nýta á ýmsa vegu:
- Hópavinna með 6 nemendum sem lesa saman. Einn les í einu og hinir fimm hlusta á meðan. Endurtekið 4x. Eftir lestur kvitta börnin á marglyttublað samnemenda og/eða lita marglytturnar í fallegum litum.
- Hópavinna með 3 nemendum. Einn les í einu og hinir tveir hlusta á meðan. Endurtekið 8x. Eftir lestur kvitta börnin á marglyttublað samnemenda og/eða lita marglyttunar í fallegum litum.
- Paralestur. Tveir nemendur lesa til skiptis fyrir hvorn annan. Hér er hægt að skipta reglulega um lesfélaga yfir vikuna og skrá nöfnin inn í marglytturnar.
- Einstaklingslestur. Nemandi les og litar eina marglyttu í hvert sinn sem hann lýkur lestrinum. Einnig getur hann skráð lesnar blaðsíður eða mínútufjölda inn í marglytturnar.
Áfram Marglyttur! Áfram marglyttulestur! 🙂
Uglulestur
Hvað er skemmtilegra en að kasta tening og lesa? Og læra að lesa á tening í leiðinni? Uglulesturinn felst í því að nemendur kasta tening til að ákveða hversu margar blaðsíður eða mínútur er lesið í hvert sinn. Í stað þess að skrá tölustafina teikna nemendur teningana í reitina. Hér getur kennari leyft sér að setja ýmsar reglur s.s. að til að byrja verði að fá 6, ef talan 1 kemur upp verði að kasta aftur og eins má nota 2 teninga fyrir eldri börn og þá leggja saman eða margfalda teningana saman til að ákveða fjölda lesinna mínútna. Bara það sem hugmyndaflugið leyfir hverju sinni :-). Úúú… bara gaman!
Ágústspretturinn 2019 er til heiðurs alþjóðadegi uglunnar sem er 4. ágúst ár hvert. Í byrjun september 2019 verður hægt að nálgast smá fróðleik og orðasúpu um ugluna hér.
Bókahillan
Í bókahillunni eru 15 bækur. Þegar nemandi hefur lesið bók er hún “sett í hilluna” með því að rita titil hennar á bókarkjöl á skráningarblaðinu. Á sama hátt er hægt að búa til pappírsbókahillu upp á vegg kennslustofunnar/barnaherbergsisins með stóru bókakjölunum sem fylgja. Þá klippir nemandi kjölinn út, skráir titil bókarinnar á línuna og límir bókina upp á vegg. Einnig má nýta kilina til að útbúa falleg bókamerki til að plasta.
Handboltalestur
Handboltalestur er 2 vikna (14 daga) lestrarátak. Í hvert sinn sem lesið er skrá nemendur nafn íslenskrar handboltahetju á línuna og lita leikmanninn í litum félagsliðsins sem hann/hún æfði með á sínum yngri árum. Á eftir nafninu má skrá lesnar mínúturnar innan sviga, dæmi: Harpa Melsteð (20 mín) eða Arnór Ingi (15 mín). Góða skemmtun í handboltalestrinum og ÁFRAM ÍSLAND.
Pacmanlestur
Hver fæddur 1980 eða fyrr man ekki eftir því að hafa spilað PacMan í stóra spilakassanum í sjoppunni á horninu? Það er alveg kominn tími til að dusta rykið af þessum gaur og kynna hann fyrir yngra liðinu! Og ekki er leiðinlegt að skella einum PacManlestrarspretti á mannskapinn í leiðinni. Hér má hugsa sér ýmsar leiðir til að vinna með skjalið, t.d. að láta reitina tákna hvern dag sem lesið er, eða þau skipti þegar kennari les fyrir bekkinn. Einnig má skrá lesnar mínútur í hringina og hafa ákveðið ávaxtaþema í nesti þá daga sem nemendur ná þeim. Að sama skapi geta draugarnir táknað umbun af einhverju tagi og/eða að þann dag þurfi nemendur að lesa helmingi meira en vanalega. Það er allt galopið í þeim efnum og bara eitt skilyrði fyrir að hlaða niður PacManlestrarskjalinu, en það er að rifja upp taktana hérna :-).
Sjá einnig:
Sparilestur
Fyrir hverjar 10 mínútur sem nemendur lesa skrá þeir inn í peningana eða lita. Hér gefst skemmtilegt tækifæri að vinna með munstur og þrykk með því að leggja 10 króna pening undir kringlóttu reitina, og rissa yfir svæðið til að ná munstrinu í gegn. Fyrir þá sem eiga í erfiðleikum með að staðsetja myntina nógu nákvæmlega undir hringjunum er hægt að taka peningamunstrin upp á hvítt, autt blað, klippa svo út og líma í reitina.
Lesbjöllur
D5 Creation