Ritlist
now browsing by tag
Sjóræningjasaga
Sjóræningjar eru spennandi viðfangsefni að skrifa um og hægt að fara margar leiðir í þeim efnum s.s. að skrifa almennt um þá og iðju þeirra, velja sér frægan sjóræning og afla heimilda um hann, eða skrifa um þekkta sögu eða mynd sem fjallar um sjóræningja.
Talaðu eins og sjóræningi, eða Talk like a Pirate Day, er skemmtilegur merkisdagur sem haldinn er hátíðlegur 19. september ár hvert. Þá notar fólk orð og orðatiltæki sem sjóræningjar myndu velja og prófa að rymja og urra orðunum út. Nálgast má verkefni tengt sjóræningjadeginum hér.
Vangaveltur
- Hvað veistu um sjóræningja?
- Hafa sjóræningjar herjað á Ísland?
- Ef svo er hvar þá?
- Voru víkingar sjóræningjar?
- Á hvaða tíma réðu sjóræningjar yfir úthöfunum?
- Herja sjóræningjar enn á sjófarendur?
Lesefni
- 15 svakalegir sjóræningjar eftir Illuga Jökulsson
- Sjórán og siglingar eftir Helga Þorláksson
Áhugaverðir tenglar
- Wikipedia: Tyrkjaránið
- Vísindavefurinn: Hvaða heimildir eru til um tyrkjaránið?
- Vísindavefurinn: Hvaðan komu víkingarnir og hvaða áhrif höfðu þeir í öðrum löndum?
Að spinna sögu
Að spinna sögu er nýstárleg og skemmtileg nálgun í ritunarkennslu. Nemendur tylla bréfaklemmu í gegnum blýantsodd og spinna henni í hringi. Oddur bréfaklemmunnar ákvarðar hvað sagan mun fjalla um hverju sinni, hvernig hún byrjar, hvaða persóna er í henni, hvert umhverfið er, innri tími, ytri tími, viðburðir, vandamál, endir og hvaða lærdóm má draga af sögunni. Svo er það nemendanna að láta allt ganga upp.
Á hverri skífu eru fjórir mismunandi möguleikar svo nemendur geta nýtt skjalið í fjögur ólík ritunarverkefni. Útkoman í nemendahópnum getur orðið ansi fjölbreytt og söguþráðurinn sömuleiðis skemmtilega óútreiknanlegur. Það væri því einnig áhugavert að nýta formið í framsögn.
Ef nota á skjalið oftar en einu sinni er tilvalið að lita reitina sem bréfaklemman lendir á gula þegar efnið er spunnið í fyrstu söguna, rauða í þeirri næstu, græna með þriðja skáldverkið og loks bláa. Neyðin kenndi naktri konu að spinna en skyldi hún hafa prófað að spinna sögur?
Að skrifa á ensku
Hver elskar ekki Yogi te og fallegu lífsspekina á tepokunum? Hér er uppskrift að öðruvísi enskutíma: 1) Soðið vatn. 2) Yogi te á línuna. 3) Slökunartónlist í útvarpinu. 4) Ritun á ensku. 5) Kósí. 6) Kósí. 7) Kósí :-).
Nemendur geta líka valið um að þýða spakmælin í stílabók eða nota þau sem innblástur að styttri eða lengri ritverkum.
Hver var annars að tala um að láta einhvern finna til tevatnsins? Neee… ekki með Yogi!!
10 atriði um mig
Hvaða 10 atriði ættu aðrir að vita til að kynnast mér betur? Hvað hef ég afrekað sem enginn veit um? Hvaða drauma geng ég með í maganum? Hvað læt ég ekki bjóða mér? Hér má bæði nýta skjalið í naflaskoðun með nemendum en einnig mætti hugsa sér að gefa ímyndunaraflinu lausan tauminn og skálda eitthvað skemmtilegt á línurnar :-).
Þetta er ég
Hver er ég í raun og veru? Hvað gerir mig að mér? Hvernig lít ég út? Hvernig er nánasta samfélagið mitt í mannheimum? Á ég áhugamál? Hvað með vini og vinkonur? Hvað finnst mér leiðinlegt, skemmtilegt, áhugavert? Hvað langar mig að gera þegar ég verð stór? Ritunarverkefnið Þetta er ég er fínasta naflaskoðun fyrir mig og ekki verra að æfa sig svo að fara í pontu og lesa upp meistarastykkið eða hengja það upp á vegg fyrir aðra til að kynnast mér betur. Líka gott að komast í smá ritunargír eftir sumarfríið og kynnast bekknum betur. Eða hvað finnst kennaranum mínum um það?
Að nota orðatiltæki 1
Ertu að skrifa sögu? Vantar þig hugmyndir til að brjóta upp textann og auðga hann með forvitnilegum orðatiltækjum? Hér er listi með 20 mismunandi hugtökum sem tengjast mannslíkamanum og allir ættu að kunna. Góða skemmtun!
Sjá einnig
Skriftarskífa
Efni og áhöld: Skæri, ritföng og föndursplitti.
PacManritun er skemmtilegt verkefni sem reynir svolítið á föndurfingur um leið og nemandi gefur sköpunargáfunni lausan tauminn. Áður en ritun PacMansögunnar hefst útbúa nemendur skriftarskífu með gula gæjanum og svara nokkrum spurningum um hann, sjá leiðbeiningar á verkefnablöðum. Svörin nota þeir svo sem beinagrind í sögugerðinni. Hver er þessi PacMan? Hverjir eru bestu vinir hans? Hvernig eru fjölskylduhagir hans? Af hverju er hann svona óður í ávexti? Gott er að ljósrita skífurnar á stífari pappír en um að gera að leyfa nemendum að myndskreyta PacMan að vild.
Sjá einnig:
Að segja álit sitt
Ertu að skrifa sögu? Er samtal í sögunni? Þurfa persónur að segja skoðun sína? Þarft þú stundum að segja þína eigin skoðun? Hér er listi með 20 mismunandi leiðum til að segja sína skoðun. Góða skemmtun!
Sjá einnig
D5 Creation