Kennarinn.is

Einn fyrir alla…

Lestrarsprettir

now browsing by tag

 
 

Bekkjarlestur

Í bekkjarlestri lesa nemendur í 30 daga og skrá fjölda blaðsíðna í hvern reit. Markmiðið er ekki að lesa sem mest heldur halda út 30 daga sprett svo inn á milli eru stjörnumerktir umbunarreitir sem kennarar og foreldrar geta útfært eftir þörfum.

Umbunarreiti má þannig útfæra á margvíslegan máta s.s. að lesa með hárkollu, lesa undir borði, lesa fram á gangi, lesa úti, …  Einnig má hugsa sér að nemendur sem heild safni stjörnum sem kennari skráir þá upp á töflu og þegar komið er ákveðinn stjörnufjöldi sé uppbrot af einhverju tagi á kennslustund. Það er nefnilega allt opið og ekkert mál að gera lesturinn skemmtilegan og spennandi! Ekki verra að hafa 5 stjörnu lestrarsprett til að styðjast við, smelltu á bláa linkinn efst til að tryggja þér frítt eintak ;-).

Lestrarskráin

Lestrarkráin er nokkurs konar lestrarbókhald þar sem nemendur skrá dagsetningu, lesnar síður og lesnar mínútur. Skjalið má einnig nota sem skipulagsgagn þar sem nemendur setja sér lestrarmarkmið fram í tímann, sjá einnig lestrarsprettinn Lestrarplanið.

Með lestrarskráningunni gefst kennara og nemendum tækifæri til að skoða bekkjarlesturinn í nýju samhengi s.s. hversu margar mínútur eru nemendur í bekknum búnir að lesa síðustu vikuna? Hvað voru margar blaðsíður lesnar á þessu tímabili? Hvert er meðaltalið af a) lesnum blaðsíðum b) fjölda lesinna mínútna? Hvert er miðgildið í báðum flokkum? Tilvalið er að setja niðurstöður hvers og eins upp í stöplarit annars vegar og niðurstöðu bekkjarins hins vegar og bera saman. Hvað er skemmtilegra en að samþætta stærðfræði og lestur? Góða skemmtun! 🙂

Lestrarplan

Lestrarplanið er öðruvísi og skemmtilegur lestrarsprettur. Nemendur ákveða sjálfir hvaða tímabil þeir ætla að lesa en frá því að þeir byrja tekur spretturinn 2 vikur með helgarhléi á milli. Nemendur haka í hvort þeir ætli að lesa ákveðinn blaðsíðufjölda eða mínútufjölda, og áætla magnið fram í tímann með því að skrá tölustafinn í reitinn undir vikudögunum. Þegar markmiði dagsins er náð kvitta þeir undir með fingrafarinu svo nauðsynlegt er að hafa blekpúða við höndina. Hér gefst gott tækifæri til að rifja upp hinar ýmsu fingravísur.

Bókahillan

Í bókahillunni eru 15 bækur. Þegar nemandi hefur lesið bók er hún “sett í hilluna” með því að rita titil hennar á bókarkjöl á skráningarblaðinu. Á sama hátt er hægt að búa til pappírsbókahillu upp á vegg kennslustofunnar/barnaherbergsisins með stóru bókakjölunum sem fylgja. Þá klippir nemandi kjölinn út, skráir titil bókarinnar á línuna og límir bókina upp á vegg. Einnig má nýta kilina til að útbúa falleg bókamerki til að plasta.

Pacmanlestur

Hver fæddur 1980 eða fyrr man ekki eftir því að hafa spilað PacMan í stóra spilakassanum í sjoppunni á horninu? Það er alveg kominn tími til að dusta rykið af þessum gaur og kynna hann fyrir yngra liðinu! Og ekki er leiðinlegt að skella einum PacManlestrarspretti á mannskapinn í leiðinni. Hér má hugsa sér ýmsar leiðir til að vinna með skjalið, t.d. að láta reitina tákna hvern dag sem lesið er, eða þau skipti þegar kennari les fyrir bekkinn. Einnig má skrá lesnar mínútur í hringina og hafa ákveðið ávaxtaþema í nesti þá daga sem nemendur ná þeim. Að sama skapi geta draugarnir táknað umbun af einhverju tagi og/eða að þann dag þurfi nemendur að lesa helmingi meira en vanalega. Það er allt galopið í þeim efnum og bara eitt skilyrði fyrir að hlaða niður PacManlestrarskjalinu, en það er að rifja upp taktana hérna :-).

Sjá einnig:

Jólalestur

Fyrir hverjar 10, 20 eða 30 mínútur sem nemendur lita þeir einn piparkökukarl í gulum, rauðum eða grænum lit. Í lok desemer er tekið saman hversu margar klukkustundir og mínútur lesið var í jólamánuðinum.

tetrislestur

Lestrartetris er skemmtilegur lestrarsprettur þar sem reynir á nemendur að fylla sem best upp í óútfylltu töfluna. Nemendur byrja á því að velja liti á formin og eftir hvern 5-35 mínútna lestur skrá þeir árangurinn. Ef lesið er meira en 35 mínútur geta nemendur notað fleiri en 1 form til að skrá. Lestrartetris kemur í 2 útgáfum þar sem nemendum gefst einnig tækifæri til að leggja heildarlestrartímann saman og skrá sem mínútur og klukkustundir.

Fótboltalestur

Leiðbeiningar áður en lestur hefst:
Veldu fjóra af þínum uppáhaldsfótboltamönnum eða -konum, og skráðu númerin þeirra í stafrænu klukkureitina. Skráðu nöfnin þeirra undir númerin og litaðu treyjurnar í fjórum mismunandi litum. Þegar þú lest til heiðurs einhverju af þínu uppáhaldsíþróttafólki þá lestu jafnmargar blaðsíður og treyjunúmerin segja til um, og litar einn bolta í sama lit. Dæmi: Þú valdir Margréti Láru Viðarsdóttur/Birki Bjarnason á fyrsta bolinn, gerir töluna 8 í stafræna reitinn og ákveður að hafa treyjuna bláa. Ef þú ætlar að lesa þessari manneskju til heiðurs klárar þú 8 blaðsíður og litar einn bolta bláan. Ef þú lest 16 blaðsíður litar þú tvo bolta bláa. Á næstu treyju valdir þú Hallberu Guðnýju Gísladóttur/Alfreð Finnbogason og skráir því töluna 11. Þú valdir rauðan lit á treyjuna og litar einn bolta rauðan í hvert sinn sem þú lest 11 blaðsíður (2 boltar =22 bls., 3 boltar =33 bls. o.s.frv.). Þú klárar svo að velja íþróttafólk á seinni tvo bolina og byrjar lestrarsprettinn. Góða lestrarskemmtun og ÁFRAM ÍSLAND!